Сёлета Будслаўскія рэкалекцыі адбыліся ўжо 9 раз. Але падобныя рэкалекцыі маюць яшчэ больш доўгую гісторыю, бо перад Будславам некалькі гадоў праводзіліся ў Баранавічах.

Гэтыя рэкалекцыі праводзяцца ў апошнія дні жніўня, перад пачаткам навучальнага года, каб дзеці маглі набрацца духоўных сіл на цэлы год. Адметнасць гэтых рэкалекцыі і ў тым, што яны праходзяць у месцы, куды стагоддзямі накіроўваліся тысячы пілігрымаў, перад цудоўным абразом Божай Маці, у якой знаходзіла і знаходзіць паратунак мноства людзей.

Рэкалекцыі доўжацца шэсць дзён і кожны год яны маюць сваю тэматыку. Праграма дня ўключае малітвы, спартыўныя практыкаванні, творчыя заняткі, інтэлектуальныя і спартыўныя спаборніцтвы і, канешне, гульні, забавы. На рэкалекцыях дзеці вучацца быць добрымі людзьмі, жыць па-хрысціянску, сябраваць паміж сабой, справядліва спаборнічаць, перамагаць і быць пераможанымі, адказна і старанна выконваць свае абавязкі.  Цэнтральным пунктам дня, як і галоўным момантам усяго жыцця хрысціянаў, з’яўляецца Св. Імша, падчас якой дзеці і моладзь сустракаюцца з Жывым Езусам у Эўхарыстыі. Кожны дзень пачынаецца і заканчваецца малітвай у Будслаўскім санктуарыі. Увечары кожнага дня ўдзельнікі робяць трацыцыйнае для нашай парафіі кола і, ўзяўшыся за рукі, спяваюць гімн да Маці Божай Будслаўскай.

У рэкалекцыях прымаюць удзел школьнікі рознага ўзросту: ад 7 да 17 гадоў. Аднак ёсць і тыя, хто неаднаразова ўдзельнічаў у рэкалекцыях, яшчэ пачынаючы з Баранавіч. Сёння гэта ўжо дарослыя людзі, якія працуюць, некаторыя маюць свае сем’і і дзяцей, але ўсе яны выраслі на гэтых рэкалекцыях і надалей прагнуць праводзіць час з Богам і адзін з адным. Чацвер на Будслаўскіх рэкалекцыях з’яўляецца днём сустрэчы выпускнікоў. Увечары ў Будслаў з розных куткоў Беларусі збіраюцца ўсе тыя, хто калісьці быў іх удзельнікам, каб памаліцца і правесці час разам.

Дзякуем Богу і арганізатарам рэкалекцыі ў Будславе, якія прыносяць духоўны плён на працягу ўсяго года!

Прапануем фотаздымкі з усіх 9 гадоў рэкалекцый, якія дапамогуць наблізіць іх дух.